Friday, April 29, 2011

Мандахын яруу

                                            Тамд....
       
               Улаан нараа залгисан хар тэнгэрийн дор
               Ууль шувуу уйлж,ёр даллана.
               Сүнсний амьсгал шингэсэн шилэн сар зовиурлаж
               Сүүлчийн дусал нулимс алган дээр цонхийно.
               Амьгүй,амьдрал минь надаас үхэл нэхнэ
               Аавыгаа л өрөвдөхдөө би зовлонгоо чирч гаслана.
               Бурхадын нүдэнд бусдаасаа илүү гуниг байна
               Бүү үзэгд,би тамд төрчихсөн юм байна
                                                                             

                                                                           2008.03.23



                  Согтуу зураач би саарал ертөнцдөө уусна.
                  Саран дээр чинийхээ мэлмийг зурна.
                  Гуниг тунасан харцыг чинь урлахад бийр чичирнэ.
                  Гурван шөнийн нойроо умартаж бясалгана.
                  Санамсаргүй ганцхан өнгө л илүү тавьчихвал
                  Сар уйлчихна,солгой гараараа би дарс шимнэ.
                
                                                                         2008.10.20      




                                     Амьдралаас ангид хайр


                Өвлөөс цочихдоо л өвөрт чинь дулаацсан бүсгүйг
                Өглөө орцонд нь хүргээд нойрондоо харамсах
                Хорьхон насаа дураар хайхрамжгүй үрэх
                Хонгор залуу миний хямгадаагүй хайрын уяа
              

                Сэтгэлийн чинад дахь дурсамжинд хааяахан болзох
                Сургаар л чамайгаа дотносч,сул асгасан гэзгээ имрэх
                Ахуйн булингарт тунасан ганцхан үнэн минь
                Амьдралаас ангид чамайгаа би үүрд хайрлах.


                                                                           2009.01.09


    Найзтайгаа хааяахан таарах сайхан байдаг шүү.Уг нь нэг сургууль өдөр бүр таарч болох. Чөлөөт цагаараа хичээлд суудаг Бэгтэр,  чөлөө завгүй хичээлдээ бүрэн суудаг Мандах хоёр ер нь ховор таарах нь арга ч үгүй юмдаа.
Юутай ч гэгээн найзынхаа төлөө сайныг ерөөж явдаг шүү.Найз нь чамд шүлгээ л  бичихээ битгий орхиорой гэж захидагдаа.
Цаг хугацааны нэгээхэн хэсэгт ер бусын шүлгээ бичсээр байгаа бизээ миний найз.Дээр яруу найрагч таны шүлгүүдээс нийтэллээ,зохиогчийн зөвшөөрөлгүй,зохиосон юмгүй Бэгтэр.